Her finn de den samla årsmeldinga for Hyen Idrettslag 2025.

Vi minner også om årsmøtet torsdag 26. februar 2026 kl 19:30 i Samfunnshuset :-)    

                           Årsmelding for Hyen Idrettslag 2025.pdf

Julehelsing

Kjære samarbeidspartnarar og Hyarar.

Førjulsesongen 2025 er no over. For mi eiga del blei sesongstarten dessverre svært krevjande. Eg gjekk to svake skirenn under sesongopninga, og kort tid etter vart eg råka av influensa. Dette har ført til svært få konkurransar . Samstundes er sesongen lang og mykje ligg framfor oss.

Med bakgrunn i erfaringane frå dei siste åra har eg valt å ikkje forhaste ein retur til konkurranse. I staden har eg prioritert å lytte til kroppen og lagt ein strukturert og langsiktig plan fram mot NM på ski, som startar 14. januar. Dette blir eit av sesongens hovudmål og eg håpar å kunne vise eit langt sterkare nivå der enn det eg har fått vist dei siste åra.

Sjølv om dei sportslege resultata dei siste åra har vore utfordrande, set eg stor pris på den støtta eg har motteke. Eg er takksam for alle som følgjer med og viser interesse, og denne støtta betyr mykje i ein periode der tolmod og langsiktig arbeid står i fokus. Eg har sterk tru på at eg vil kome betre tilbake utover vinteren.

Jula vert i år tilbrakt i Valdres, der det for tida ligg kring ein halv meter snø og tilhøva for langrennstrening er svært gode. Dette gir eit godt utgangspunkt for solide førebuingar fram mot Norgesmesterskapet

Til slutt vil eg ynskje dykk alle ei riktig god jul og eit godt nyttår. Eg håpar verkeleg at det snart kjem skikkeleg med snø og gode skiforhold i Hyen også, slik at de alle kan kome dykk ut i løypene og kjenne på den ekte skigleda.

Langrennshelsing 

Jon Rolf Skamo Hope

Haustoppdatering frå Jon Rolf Skamo Hope

Hei alle samarbeidspartnarar!

Om under ein månad startar ein ny skisesong på Beitostølen, og eg vil nytte høvet til å sende ei lita oppdatering før det brakar laus.

I år har vegen fram mot sesongopninga vore litt annleis enn tidlegare. For første gong på om lag ti år har eg stått utanfor både landslag og privatlag. Det har gitt meg meir fridom og høve til å styre kvardagen og treninga på ein heilt ny måte. Samstundes har eg ikkje vore heilt åleine. Som mange kanskje hugsar, har eg funne tilbake til den gamle trenaren min, som eg hadde frå eg var 16 til 20 år gammal. Saman har vi fått orden på skadar og lagt om treninga ein god del. Det har vore inspirerande, og eg kjenner at kroppen responderer svært godt.

I skrivande stund oppheld eg meg på den spanske austkysten, nærmare bestemt i Dénia på Costa Blanca. Her legg eg ned dei siste barmarksøktene før vinteren kjem. Området er kjent for å vere base for mange profesjonelle syklistar. Det er ein perfekt stad for rulleski, springing og mengdetrening. Kombinert med 20 varmegrader og solrike dagar er det store kontrastar til Noreg på denne tida av året.

Samtidig vil eg ynskje Larstunet.no velkomen på laget! Det er veldig kjekt å ha med ei ny lokal bedrift som ynskjer å støtte opp om satsinga mi. Eg set stor pris på at fleire frå heimbygda har lyst å vere med.

Det skal ikkje stå på førebuinga og tilrettelegginga denne sesongen. Eg må også rette ei stor takk til foreldra mine og alle samarbeidspartnarane mine, som gjer det mogleg å gjennomføre slike førebuingar. Det trur eg er heilt avgjerande for å ta nye steg som utøvar og gjere den vesle forskjellen inn mot sesongopninga.

Eg står på startstreken på Beitostølen 22. og 23. november. Eg gler meg til å kome i gang.

Takk til:

• AOH-stiftinga
• Hyen Fisk
• Nordfjord Laks
• Hyen IL
• Maskinentreprenør Torleiv Straume
• Sporten Beitostølen
• Larstunet

Langrennshelsing frå
Jon Rolf Skamo Hope